窺探顏色的秘密 教你室內設計如何玩轉顏色（2）
上集同大家講咗好多關於顏色俾人既感覺同基礎知識，係咪覺得意猶未盡呢？唔使擔心，因為未完㗎，都仲未教大家點樣去用色。顏色配搭對於室內設計係一個好大嘅學問嚟，若果用色搭配不當、色彩比例失調、色彩雜亂無章，係有機會令人眼花繚亂，唔舒服。今集就會講下顏色點樣應用喺室內設計入面同配搭原則，繼續教你如何玩轉顏色！
根據風格而定的色彩
裝修風格與色彩需要協調，唔同嘅裝修風格，顏色配搭都會有所不同。就例如無印風，顏色係啡、白為主，唔會出現大紅大紫嘅牆身。而工業風主色調就係黑、白、灰，如果你係響往色彩繽紛嘅家居，呢種風格就未必唯適合你。根據唔同風格去揀選出家居顏色同傢俬小物，達至室內環境色彩既和諧感。
室內設計色彩搭配不宜超過三種
一般嚟講，室內設計色彩搭配唔應該超過三種。其中白色、黑色唔計算在內，而金、銀兩色可以作為點綴配搭。通常先選擇一個主色調，配色可以利用近似色或中性色去調和點綴。假如你好鐘意色彩繽紛嘅家居，千祈唔好咩顏色都亂咁放喺裝修入面，除非有資深嘅室內設計師為你把關，熟悉色彩組合，調配合適嘅色彩，而且能確保空間色彩與風格達到協調，就有可能多於三種顏色嘅配搭。
另外想家居氣氛變得活潑啲，唔一定要塗上唔同顏色嘅牆身，油漆唔係為增添色彩嘅唯一方法，可以利用枕頭、毛巾等小型家居裝飾品，亦都係令居家空間充滿活力嘅方法啊！
按照空間功能而定的色彩
家居顏色未必要全部統一，可以分開空間去挑選顏色，起到劃分嘅作用。例如睡房適合用淺藍、白色作為牆身顏色，俾人一種鎮靜，舒壓嘅感覺。因為睡房係我地用嚟休息睡眠嘅空間，如果用橙色、紅色呢種好精神同刺激嘅顏色，有可能會過於精神然後瞓唔着教。
客廳空間唔大嘅話建議可以用白色或低彩度嘅顏色，因為愈淺嘅顏色會令空間感增強，另外呢類顏色都令空間採光度提升，家中會比較明亮光猛。相反愈接近黑色既深顏色會令空間變得狹窄，通常呢類顏色只會局部用喺牆身或者作點綴裝飾，唔會塗上整幅牆。一來怕空間變狹，二來深色嘅採光度低，需要十分足夠嘅照明燈飾。
有選擇困難症的你可從傢具中挑選顏色
雖然上面都講咗好多顏色配搭技巧，但每當裝修屋企，傢俬同裝飾品都會好快選擇到，反而望住個色板有咁多種顏色真係好迷恾，究竟點揀牆身顏色好呢？小編就俾個tips大家啦，就係喺你選擇嘅傢俬同裝飾品入面，睇吓最大嘅傢俬顏色係咩。例如梳化揀左張藍色，牆身可以選擇藍色去相配；選擇木製傢俬較多，牆身可以係白色或大地色去襯托。若果家中有同年齡層既人嘅一齊居住，可以選擇低彩度嘅顏色綜合唔同特質性格嘅人。
