窺探顏色的秘密 教你室內設計如何玩轉顏色（1）
顏色喺室內設計入面可以話係核心之一，唔同嘅顏色代表住唔同嘅心情同感覺。如果想喺家中專心工作同啟發創意應該用咩顏色？有咩顏色會係百看不厭？想室內環境採光度提高應該用咩顏色？種種疑問小編將會為你解答，帶你進入繽紛色彩嘅世界，深入窺探一下顏色嘅秘密，教你玩轉顏色。
色彩基礎知識
首先教下大家一啲色彩基礎知識。色彩係分咗「冷色」、「暖色」、「中性色」。冷色指藍、綠、紫色；暖色指紅、黃、橙；中性色指黑、白、灰。每種顏色都有獨特嘅感覺，暖色代表刺激開心、樂觀、活力。冷色代表安撫、冷靜，有時會散發出悲傷味道。中性色主要用於調和色彩搭配，突出其它顏色。
等小編考下你，藍色你會聯啲咩？係咪天空同大海呢？我地嘅大腦好自然將藍色聯想到天空或者大海，而天空或者大海會比人一種寧靜，穩定嘅感覺，所以藍色就代表住平靜安穩，令人更專心。若果想係家中專心溫書或工作，就可以揀藍色作為設計主色。
色彩象徵
黃色：熱情、積極、陽光、勇於挑戰事物。呢啲應該唔意外，除咗色彩本身明亮嘅特質，多數我哋會將黃色同笑哈哈符號聯埋一齊，所以都有歡樂嘅感覺。
綠色：好多和平組織、環保團體會選擇嘅色彩。因為當我地望到綠色嘅時候，迅速就聯想到大自然、草、樹葉，所以係和諧、清新、天然嘅色彩。另外綠色都有緩解眼睛疲勞既效果。
紅色：熱情、生命力既象徵，亦代表歡樂與喜慶，同時刺激腦電波，煽動情緒，促進工作效率，令你能瞬間諗出更有創意既新想法。假如需要靈感嘅工作，可以試試家中或office加入紅色小物，切記唔好過多，因為過多紅色反而會令人有煩躁嘅感覺。
紫色：偏女性化嘅優雅色彩，象徵尊嚴、高雅、神秘。淡紫和粉紅都帶有少女嘅氣質。
白色：樸素、純潔、乾淨、安靜。主要用於調和色彩搭配，耐看不厭嘅顏色。
黑色：同白色一樣主要用於調和色彩搭配，係富個性嘅顏色，象徵莊重、沉靜、嚴肅。
Pantone色彩研究所
講到顏色不得不提知名嘅Pantone色彩研究所。佢係一間將顏色命名嘅公司，搵出時下流行嘅顏色，同時每年會選出年度代表色。就好似2021年所選出PANTONE17-5104極致灰與 PANTONE 13-0647 亮麗黃嘅組合。亮麗黃係明亮快活，充滿活力，注入太陽能量既暖黃色。極致灰係海灘上石子嘅顏色，默默咁經起風浪，有鎮靜、穩定嘅感覺，象徵堅定可靠。22年嚟嘅年度代表色已經影響眾多行業嘅產品開發與採購決定，包括服裝、家居及設計產業。
小編覺得真係好犀利啊！如果你地係開店或者家居，對於簡咩顏色十五十六既時候，不妨都可以參考下Pantone年度代表色。
認識完顏色嘅基礎知識，下一篇將會同大家講下顏色點樣應用到喺室內設計當中啦！