【裝修Suggestion】常見七大地板鋪法，一款地板七個風格
除左牆身之外，地板係佔全屋絕大部分嘅面積。有無唸過就算同一款地板，都可以帶出唔同嘅風格效果呢？原來各種地板嘅鋪貼方法都會有唔同嘅效果，就好似田字鋪法會帶出復古懷舊感。咁你又知唔知邊種鋪法會慳返啲磚，邊種鋪法原來要加錢俾師傅呢？等小編今日就介紹地板嘅七大拼貼方法俾你哋啦。
工字鋪
工字鋪施工簡單、快速，地板損耗少，性價比高，感覺工整兼整齊，好適合簡約風格家居同埋鍾意整齊工藝嘅你。
對齊鋪
對齊鋪故名思義就係將地板對齊然後貼上，係最簡單嘅鋪法。感覺乾淨俐落，不過呢種鋪法就比較少人用，大多數覺得效果過份單調，較多出現喺日式和室、簡約風格。
魚骨鋪
魚骨鋪同人字鋪既工法類似，但就無人字交叉，必須喺空間中心點開始。拼接嘅準確度比人字拼更高，人工都會略貴。效果感覺氣質古典，適合古典歐式嘅裝修風格。
人字鋪
人字鋪喺傳統歐洲嘅木地板鋪法之一，大受北歐風或歐式家居歡迎，亦會常見於工業風格、鄉村風格之中。不過呢種鋪法邊角處嘅收口相對難度較大，要搵有經驗嘅師傅先整得靚。
亂工鋪
亂工鋪係廣為受歡迎嘅一種鋪法。無工字鋪同對齊鋪咁工整，視覺效果上自然唔刻意，而且施工簡單快速，耗材亦比起其他鋪法少，所以慳返唔少材料錢，好多人都會選擇呢種鋪法。
梯級鋪
梯級鋪呈梯級形狀，又名步步高升，名字聽起上嚟寓意吉祥，可能因為咁嘅關係亦喺受歡迎鋪法之一。
田字鋪
田字鋪係四四方方嘅格紋，通常舊樓會見得多呢種鋪法，比較復古懷舊。現時少人做呢種鋪法，始終普遍現代裝修風格較少會用，但如果你喜歡懷舊嘅設計，田字鋪就好適合你啦！
鋪貼方向
除咗鋪貼款式，鋪貼方向亦可以令地板有多啲變化。除咗橫鋪同直鋪，仲有斜鋪。斜鋪應該喺最多人鍾意嘅方向，因為香港唔喺咁多屋都四四方方，而斜鋪正正就好適合喺不規則嘅空間鋪設，係不規則嘅室內入面無論用橫鋪或直鋪，視覺上都會產生唔對齊嘅感覺，反而用斜鋪嘅方式就唔會發生呢種情況。
斜鋪通常以空間45度斜對角為拼接基準線，但實際角度都要視乎場地同師傅習慣。如果你哋想選擇斜鋪，一定要事先詢問師傅會唔會做，因為人工相對較貴，消耗嘅磚料亦較多。通常進行直鋪、橫鋪多預10% 瓷磚，斜鋪則需多預備15% 瓷磚。
除左以上常見嘅地板鋪法，仲有林林種種嘅特色鋪法，無論用邊種鋪法，都喺各有特色，可以睇返自己嘅喜好同預算去作出決定，亦要依照場地狀況同師傅經驗評估，咁先可以揀到最合適心選。