【物料攻略】玻璃種類介紹
室內裝修中主要材質除咗木材、磚材等等，玻璃亦都係建築或家居都會廣泛用到嘅主要材質。唔單止窗户要用到玻璃，其實喺室內設計都可以用上，玻璃除咗可以增加空間感，空間好似擴大咗之外，可以增加採光度同設計感添㗎。市面上玻璃種類繁多，普遍人除咗認識窗戶嘅清玻璃之外，對於其他玻璃種類會比較陌生，可能你喺餐廳見到個玻璃花紋好特別，但又會唔知玻璃嘅稱呼，咁就要睇下今篇介紹玻璃種類，不妨考慮喺裝修中加入玻璃啦！
1. 清玻璃
大家最常認識同接觸到嘅玻璃就係「清玻璃」，係最普遍同價錢最便宜嘅玻璃。清玻璃係未經加工嘅平板玻璃，特性係無色全透明透光。由於係全透明，零私隱度，所以唔適合用喺私隱度高嘅地方，例如廁所。適合安裝喺櫃面或隔屏等，清玻璃嘅透視效果高可以大大增加空間感。
2. 磨砂玻璃/噴砂玻璃
磨砂玻璃/噴砂玻璃係一種霧面質感嘅玻璃。雖然比清玻璃嘅透光性同透視性低，但能夠引入充足光線之餘可以有返少少私隱度，而且帶有一種霧面朦朧嘅美感。價錢親民，適用於需要少許私隱度嘅地方，例如私人空間既趟門及浴屏等。
3. 壓花玻璃
壓花玻璃故名思義，表面有花紋圖案既透明玻璃，玻璃表面並不平滑。壓花玻璃具有透光不透視功能，亦製造各種唔同嘅模糊效果同光影，有良好嘅私隱度。各式各樣嘅花紋圖紋，例如：海棠紋、水波紋，能夠增加室內嘅設計感。其中長虹玻璃無過去古舊嘅雕花，呈直紋圖案，喺現代嘅家居裝修風格中最常見，比如輕奢風、現代風、簡約風等等都非常適合。
4. 藝術玻璃
藝術玻璃係以玻璃為媒介，通過工藝，例如雕刻、熱熔等方法，令玻璃添上花紋、色彩、圖案效果，將藝術同玻璃結合。藝術玻璃唔單止係一個工藝品，喺室內設計都會有佢嘅蹤影出現。價錢相對上較貴，比較適合想喺室內空間加添藝術感嘅人士。
5. 烤漆玻璃
烤漆玻璃係一種將陶磁漆料印刷喺清玻璃，經過強化爐高溫烘烤、風乾製成嘅玻璃。顏色選擇豐富嘅烤漆玻璃，能配合室內風格變化，仲可以當成白板用。除左常見於客廳、睡房，亦會用喺廚房牆面。以往廚房用磁磚比較常見，但油煙係縫位難以清潔，所以而家越嚟越多人選擇喺牆面改用烤漆玻璃，光滑平坦更加容易清潔，價格平易近人，係室內設計當中經常使用嘅玻璃之一。
6. 夾紗玻璃
夾紗玻璃係兩片玻璃間平夾一片紗狀物料，例如紗麻、棉、絲網、宣紙等，利用素材唔同嘅顏色與質地營造出特別嘅視覺效果。變化性較大，適用於唔同嘅裝修設計風格，經常被用於屏風或門上。
7. 鏡面玻璃
鏡面玻璃係指玻璃添加一層含有銀微粒或鋁微粒嘅亮面鍍膜。如果用係黑色玻璃上稱為「黑鏡」或「墨鏡」，用於茶色玻璃就稱為「茶鏡」。由於光澤度極高，能呈現好似鏡面嘅折射效果，造出視覺延伸感，空間望落更加寬敞，常見於玄關、餐廳主牆。
