教識你軟裝佈置術改變空間格調無難度！

有無試過屋企裝修完成後，傢俬買齊晒，但總係點擺放都營造唔到雜誌上或家品店嘅示範陳列室咁有格調嘅風格？究竟點解呢？可能同缺少咗軟裝佈置有關。

咩係軟裝佈置？佢係唔需要改動裝修但又可以改變空間氛圍嘅神奇方。講到咁神奇，不如今集就解釋下咩係軟裝佈置，學識點呈現出室內空間既風嘅格，進行空間大改造啦！

甚麽是軟裝佈置？

軟裝佈置闊啲講係指所有可以移動嘅傢俱，例如窗簾、盆栽、掛畫、燈光、飾品等等。簡單啲講就係為空間做出佈置，唔需要改動到裝修結構本身，著重於以色彩同材質嘅配搭，就可以呈現出生活格調，富有個人風格嘅空間。

軟裝佈置可以突顯出空間風格，而當然第一件事就係要睇返裝修嗰陣揀選嘅風格去配合。例如裝修中整左幅工業風嘅水泥牆，想整套家居有一致嘅工業風格。從單品上，可以挑選金屬水喉造型嘅燈飾、金屬鐵件等等。

如果無特別嘅裝修，只得簡潔嘅牆身地板，咁點算好呢？首先，可以多啲去觀察自己嘅生活態度、衣著打扮、興趣、品味，了解自己既生活，從自身出發去決定單品。就好似屋主鍾意畫畫，比較有藝術感，可以放一啲自己畫嘅掛畫、藝術品喺家中，從家居嘅佈置就可以睇到屋主嘅品味同喜好。

其實挑選次序都好重要，就好似我地唔會買咗咕臣先買梳化。因為梳化係大型傢俬，係客廳嘅視覺中心，比較重點要優先揀選，應該係由大至小嘅傢俬單品咁去揀。

裝修完成後可以睇下有咩能夠令空間更有格調嘅物品，亦可以慢慢隨時間一件一件添置。當添置時，可以選擇有唔同形狀、大小、花紋嘅擺設，視覺上會增添新鮮感同變化，令空間變得唔再沉悶。

建議次序

大部份新手喺網上或行家品店見到個擺設幾靚就買咗落黎，但無諗過同家中裝修風格配唔配搭，整個風格唔一致就會令整體感覺好奇怪。所以一開始佈置家居，可以慢慢隨時間一件件挑選，而且想像一下家中風格同想買嘅物品配唔配搭，咁就唔怕出錯啦。

聽到要佈置家居，可能會令新手誤會需要買好多擺設去裝飾家居。但如果空間本身唔大，又放太多裝飾品，咁就會令空間更加狹窄，所以唔好為擺而擺，唔需要佈置到全屋滿晒，要適當留白，同選擇恰當嘅家具同擺件尺寸。

選擇單品時，以為越多顏色視覺效果會更豐富，其實係錯。太多顏色會令視覺上睇得唔舒服同混亂，對於顏色上要考慮統一同變化，盡量將空間收到只剩三個主要嘅顏色，再加上少許其他顏色作點綴。可以多啲留意雜誌上同家品店示範單位嘅顏色變化，決定好用咩色做主色啦。