【物料攻略】各種裝修風格的木材配搭
上集介紹咗唔同嘅木材俾大家，但林林總總嘅木材睇到花多眼亂，訂製實木傢俬嗰陣唔知揀邊隻好？究竟北歐風、無印風要用咩木材？咁就要睇埋呢篇文章啦，今集內容會講解每種裝修風格所選用嘅木材分別。
每種木材都各有獨特嘅木紋、顏色，有深淺、冷暖顏色之分，亦有清晰細緻嘅筆直紋理、水波紋等等。淺色木會帶嚟乾淨整潔嘅感覺，深色木會有古典、沉穩嘅感覺，係配搭技巧上不外乎用深淺木色交織或者加入其他材質作混搭。
無印風
無印風主張簡約無垢，開揚感同採光度充足係好重要嘅條件。淺色木材mix白色牆身基乎係無印風既核心，所以喺木材選擇上，建議可以用松木、橡木、水曲柳等等淺色系嘅木材。呢類木材紋理清晰、色澤淡雅，自然木色同柔和木紋營造出乾淨俐落嘅感覺。如果想增加層次感，可以加入少許深色嘅胡桃木傢俬同擁有深淺色彩嘅槐木餐具，別具豐富空間色調。
北歐風
北歐風崇尚簡約、自然。由於北歐地質環境較寒冷，所以家居裝修會用到大量木材，木質傢具成為咗北歐風核心之一。木材選擇上，建議木色偏淺色，唔經過精細加工嘅木材，例如白橡木、松木、櫸木、樺木等等，以原木風貌呈現樸素自然感覺，締造出和諧、舒適嘅家居氛圍。
工業風
工業風以建築原貌呈現，喺木材選擇上，建議選擇木質粗獷、木色偏深嘅木材，例如黑胡桃，亦可加入少許淺色木作協調平衡感。主要傾向木質上無過度美化加工，非亮面嘅木材，或者可以選擇回收木，因為舊木比較有使用痕跡，有復古感，強調工業風嘅粗獷隨性。
美式風格
美式風格崇尚古典氣質，着重線條美。喺木材選擇上，會用到木色偏重兼木質紋理明顯既木材，例如櫻桃木、楸木、桃花木、紅橡木，突顯古典沉穩氣派。當中紅橡木加工性高，可以做到複雜造型同雕花工藝，運用到美式風格更顯高貴優雅。
中式風格
中式風格傾向古典優雅，加入屏風、中式花等具民族特色嘅裝飾。通常以朱紅、咖啡色為主色調，色調比較深，而木材通常加入雕刻，亦會打磨成亮面，所以喺木材選擇上會用到木色偏暖色，啡紅嘅木材，例如酸枝木、柚木、大葉檀、花梨木等等，突顯中式風格嘅華麗高貴。
