【物料攻略】裝修木材種類
木材係最重要既建築同裝修材料之一。無論工業風定北歐風，唔同類型嘅裝修風格都好，地板同埋傢俬都會用到木材，而木材都有分好多唔同
種類同深淺顏色，亦有貴有平。每種裝修風格會用到嘅木材都會有所唔同，小編分左兩集，今集教下大家木材嘅各種類型，下集就講解唔同風格最適合用嘅木材。
常見既木板種類包括實木板、夾板、纖維板。簡單少少講，實木板係以原木做裁切後拼接組合成家具；夾板係以幾層木片加入膠水壓製而成，從木板切割面可以睇到一層一層既木材；纖維板就主要將木碎、樹脂和黏合劑以高溫壓製而成；原木板係直接將樹木剖片，無添加其他木材或增加膠合物，而係直接以原木裁切加工定型成家具。通常大面積原木較稀有而且價格較貴，而家較少裝修會用到原木，多數會用實木板或夾板為主要室內設計裝修。
木材價錢方面，松木、杉木、橡膠木屬於平價木材；榆木、橡木、櫸木、梣木屬於中價木材；胡桃木、櫻桃木、柚木屬於昂貴木材。
松木
松木係一種針葉植物，木紋比較顯眼，木色偏白淡黃，而且有獨特嘅松香香氣。由於木質較軟，所以比較易加工處理，加上松木生長速度快，價錢宜人，呢種木材都被廣泛使用於傢俬、裝修板材。佢嘅缺點係易變形同易有蟲蛀問題，承拓力低，唔適合用於大型傢俬，否則會易斷裂，通常用於實木家具既輔材，如抽屜板、後背板。
橡木
橡木木種高達幾百種，建材業中常見係來自北美既白橡木同紅橡木。紋理細緻呈直紋狀，最大優點係有良好加工性。無論白橡、黃橡或紅橡都容易上色，可以染成唔同顏色，係裝修設計入面可塑性高，同時深受設計師喜愛。
梣木
梣木木種眾多，市面上常見既北美梣木、水曲柳、歐洲梣。梣木通常呈淺黃色，木紋筆直，有山形紋或水波紋，易上色，常被用於染色加工，創造唔同視覺效果。木質堅硬而且韌性強，係歐美家具經常使用嘅木材，另外亦用於製作結他、木球棒等等。
橡膠木
橡膠木係生產唔到橡膠嘅木頭加工而成，亦都係環保木材。由於擁有象牙白既木色，又稱為象牙木。質地均勻唔容易斷裂，可塑性强，但係橡膠木本身會有雜斑同黑點，而且表面比較粗糙，木質較軟，所以容易留劃痕。
杉木
主要生長喺中國、東南亞地區。杉木種類多，如雲杉、冷杉、台灣杉。杉木顏色偏紅，木理筆直，唔易變形彎曲，易於上漆、染色，加上價格實惠，所以大量運用於室內裝修。
榆木
榆木有直而粗獷嘅紋理，硬度、強度適中，一般常用作透雕、浮雕。早期榆木家具多用作供俸用既家具，所以常見於寺廟建築。
櫸木
櫸木係江南特有嘅木材，木質堅固，抗衝擊，蒸汽下易於彎曲，可以制作造型。紋理清晰，色調柔和，喺木材硬度排行榜屬於中高級別。適用於木門、地板、工藝品等。
胡桃木
胡桃木分黑胡桃木及黃金胡桃木兩種。主要產自北美、歐洲、東南亞。表面光澤，色彩豐富飽滿，木紋呈拋物線，富層次感。由於生長週期長，胡桃木需幾十年甚至百年先能夠成材，木質堅硬細密，抗腐唔易受蟲蛀，花紋特殊等優點，令胡桃木被視為高檔木材。
櫻桃木
天生含有棕色樹心斑點同細小嘅樹膠窩。木色鮮艷，紋理清晰細緻，容易鋸切、雕刻、彎曲，而且易染色。由於裝飾效果高貴以及上手舒適，所以多用於高檔家具、櫥櫃等等。
柚木
柚木含油脂量高，表面有一層特殊嘅光亮滑潤質感，木紋筆直，帶有深色木紋。木質堅硬強韌，易加工，唔易發霉，對蟲蛀既抵抗力高。因為生長速度緩慢要50年先成材，所以被視為高價木材之一，更加係緬甸、印尼被稱為「國寶」。
