如何選擇書櫃？開放式VS封閉式

身為書迷嘅你，又或者學生，屋企緊係好多書本同作業，唔知你哋又會點擺放書本嘅呢？書櫃當然係唔少得啦，書櫃亦都有分開放式或者封閉式，兩者有咩分別？又可以點樣去選擇書櫃呢？今日就會為你介紹各式各款嘅書櫃，總有啱你嘅書櫃類型！

開放式書櫃

開放式就係指完全無遮掩，可以一覽無遺全部書籍。隨時拎書嚟睇又隨時放回書本，節省左開門嘅動作，而且節省咗裝修材料，畢竟少做一個櫃門。但缺點就係容易積灰塵，受潮，由其香港屬潮濕悶熱嘅地區，書籍長期暴露係開放環境下，容易變黃變皺，所以要定時打理同埋做好抽濕防潮措施。

封閉式書櫃加裝咗櫃門，有良好嘅防塵效果，可以好好保護到書藉，減少受潮發霉同積灰塵問題。麻煩嘅一點在於每次睇書都要打開櫃門，有少許唔方便，亦有坊間話打開門嘅動作減低咗閱讀嘅意慾，而且封閉式書櫃相對上價格貴多少少。

講咗兩類書櫃嘅特性同優缺點，望落去大家都各有長短處，唔知點揀好？不如從你哋嘅藏書類型去選擇啦！

如果你嘅藏書類型偏向藝術類、設計類嘅書籍或雜誌，封面同書背通常設計上會比較美觀，可以當做裝飾品，建議就做開放式書櫃，將美麗嘅書擺放出嚟，令家中更有藝術氣息。

如果係較多實用書籍、學生作業等等，擺出來會易顯得凌亂，所以比較適合做封閉式書櫃。

若果藏書類型好不一，無特別偏好，咁係咪一定要做封閉式呢？唔係嘅，其實仲有混合型嘅書櫃做選擇。一半做開放式，放置一套或同類型嘅書籍，整齊地跟顏色或者書本尺寸去排好，另一半做櫃面掩門，可以放置分類唔同嘅書藉，避免望落混亂，中間可以混搭放置一啲裝飾擺設或相框，避免過多書藉而感覺厚重。

除咗呢種混合型嘅書櫃，仲有拉門式嘅書櫃，自由變做開放式或封閉式，令家中有較多變化造型，展示唔同嘅面貌。其實書櫃類型無定邊款先係最好，每一款都有佢嘅特點，不妨望下自己嘅藏書類型，分類好再作決定啦。