【裝修小百科】電掣離地標準高度

每日我哋都會接觸到嘅電掣，你知唔知道電掣離地嘅高度應該係幾多呢？如果電掣位置唔啱，就會造成好多不便，咁你又估唔估到點解電掣離地嘅高度都有標準？係約定俗成定有其他意思？睇下今篇文章就會知道原因。

一般電掣離地標準高度

基本電掣高度為離地面30cm左右，通常如果無特別要求，裝修師傅都會根據返標準去做要有適當嘅高度。原因係電線通常喺插頭嘅下方，預留電掣離地高度可以避免下方電線頂住左，導致放唔入插頭，所以要預留一定嘅空間。

除左一般電掣高度，屋企仲有好多地方要用到電器，而電器既電線未必咁長，解決方法之一就係加拖板。之但係拖板需要預位置去擺放，最理想嘅解決方法當然係將電掣調整合適嘅高度啦，小編就俾個參考你地啦！

客廳方面，門口安裝開關電掣，電掣邊緣距離門框要求至少15cm，高度至少130cm。至於掛牆冷氣插座高度180cm。電視機電掣最好啱啱好喺電視機後面，電視櫃嘅上面，方便插拔，而且可以遮住電線同電掣，更加美觀，建議電掣離地面距離約50cm。

睡房方面，離床頭高度為 45-65cm，書桌則為 90cm左右，依據個人使用習慣去微調。而廚房方面，電飯煲、微波爐等等家電通常擺放廚櫃上，電掣距離檯面30cm 至 40cm高度，喺電器上方為佳，但唔好裝喺爐頭上方，避免過熱有危險。

當然，插座數量視乎你所需使用嘅電器，而插座位置同高度應該配合家具、櫃大小而判定，有需要特定嘅高度就記得同師傅商量下啦。