學懂燈光色溫 裝修立即成功一半！

當裝修風格同傢俬擺位等等一切都決定好之後，到最後總係會猶豫用咩燈光好，遲遲決定唔到黃燈定白燈會好啲，全屋係咪要用一致嘅燈光？

燈光係室內設計中不可或決嘅一環。前面裝修好別緻完美，燈光色溫揀錯咗就會係一大敗筆。燈光色溫揀得啱，會令成個環境昇華，營造空間氣氛，可謂裝修最後嘅成與敗就係燈光配搭上，燈光就係裝修成功嘅關鍵因素。小編今日就教你揀選燈光色溫嘅秘訣，令裝修更上一層樓！

甚麼是色溫？

喺開始教大家點揀燈光之前，首先要了解下咩叫色溫。色溫嘅單位係K（Kevin），數值越細，光會越暖，偏黃；數值越大，光會越冷，偏白。當色溫細過3000K時，光線以黃光為主，有溫馨、放鬆嘅感覺。色溫3000K~5000K時，光線柔和，屬中性，有平靜、安祥嘅感覺。色溫大過5000K，光線以白光為主，光線明亮，有精神活力嘅感覺。

家中不同空間的燈光色溫

屋企係咪全部一樣燈光就得呢？答案其實唔一定，畢竟燈光色溫都係主觀，有人可能鍾意溫馨溫暖嘅家居，全屋用溫暖嘅黃光係無問題，不過就要考慮光線充足問題。因為黃燈會比白光暗。而且要睇埋裝修風格，就例如工業風嘅金屬鐵架、水泥設計俾人感覺粗獷冰冷，所以就會以暖黃色調嘅燈光作為調和，增添一份溫馨氛圍。如果你選擇唔到，就可以參考以下一般家中不同空間嘅燈光色溫建議：

客廳
4000~5000K（中性）

客廳係家人睇電視、傾偈嘅空間，所以主燈嘅要求係明亮溫馨，大多數以中性燈光為主。另外都可以用其他輔助光源例如燈帶、落地燈調整氣氛。

睡房
2700~3000K（暖黃光）

睡房屬於休息空間，需要柔和唔刺眼嘅光線。加上瞓覺前照冷白光會容易瞓唔着，所以光線唔需要太明亮，假如要睇書之類亦可添加床頭燈作照明。

廚房
5500~6500K之間（正白光）

5500~6500K之間（正白光）廚房係最多功能嘅區域。洗菜、切菜、洗碗等都需要明亮光線集中去完成，而且清潔時會容易睇到污跡。

廁所
4000-4500K（中性白）/低於4000K（偏暖光）

廁所係放鬆舒適嘅空間，燈光最好偏暖小小小。但由於梳洗需要充足嘅光線，建議添加牆燈作照明，如果屋企有小朋友或者老人家就可以選擇中性光，以免跣親造成意外。

不同場地所用的燈光色溫

試諗下去約會嘅西餐廳通常係咪都有好浪漫、溫暖嘅感覺呢？返到明亮嘅Office你會覺得專注同精力充沛？種種原來都同燈光有關，越低K值，光會呈現微紅色，就好似燭光一樣，屬於暖燈光，係屋企同西餐廳嘅理想色溫，可以營造輕鬆舒適嘅氛圍。至於越高K值，光會更藍同更冷，就好似日光一樣，係辦公室、體育館或學校合適嘅照明燈光，因為呢種場所都需要明亮嘅燈光去專注做野或活動。

Facebook

WhatsApp

Threads