床頭掛畫風水要小心，五大禁忌你要知

唔少人會係床頭掛畫作為房間嘅裝飾點綴，增加層次感兼美觀，但你又知唔知原來掛畫都有禁忌，掛錯畫有機會影響風水，亦會訓得唔好，甚至影響運勢，講到大件事又想知有咩禁忌，就唔可以錯過今日呢篇文章啦。

禁忌一：切忌用色太深色/大紅色

掛畫如果用黑色或太深色，有可能會令你心情低落或憂鬱，畢竟顏色學上每種顏色都代表着一啲意思同感覺，雖然黑色畫作具有個性，但相反容易產生壓抑嘅感覺，大紅色亦都會影響到睡眠，紅色容易令人聯想危險同興奮情緒，所以盡量避免係休息空間擺放紅色掛畫。

禁忌二：切忌關於神像、猛獸、人像

一啲猛獸畫作都唔應該放係床頭，例如老虎撲食畫作，通常被人覺得殺氣重，太過栩栩如生嘅眼睛就好似望住瞓覺咁，令人唔自在同緊張，風水上會影響運氣同健康唔好，人像亦都係一樣，望住畫上既眼睛會令人唔自在。而神像一般都唔能夠擺放係睡房，不論係畫定擺件都唔可以，呢個係風水中嘅大忌，擺放係睡房代表對神嘅不敬，反而得唔到庇佑。

禁忌三：切忌夕陽日落

唔少人都鍾意出外睇夕陽日落，所以擺放美麗嘅夕陽畫作又點會有問題呢？原來夕陽畫作又係風水大忌嚟，因為係風水中，夕陽代表日落西沉，影響事業一落千丈，一沉不起，所以就算係餐廳或者辦公室地方一般都唔會掛夕陽畫。

禁忌四：切忌線條複雜

好多人都會想係裝修上增添藝術氣質，所以掛一啲藝術感十足嘅抽象畫，但大多數抽象畫線條複雜，掛係床頭容易令思緒混亂，唔能夠集中工作溫書，較易受影響，唔適合求學或在家工作嘅人。

禁忌五：切忌尺寸太大

床頭掛畫唔可以太大，有啲屋主會鍾意大掛畫，可以增加睡房嘅優雅感，但過大厚重嘅掛畫會令人容易產生無形嘅壓力，影響睡眠質素，加上過大嘅掛畫有機會因承重力不足而倒下，導致意外發生。

聽落好似好多禁忌咁，但其實都有好多選擇㗎，就好似用色素雅嘅可愛卡通、顏色柔和、簡約風格既掛畫，又或者純文字嘅掛畫，最緊要望落去舒適無感到不安緊張就可以啦。

Facebook

WhatsApp

Threads