只要四步就能打造［日系無印風設計］

每次走入MUJI，你會唔會都有一種寧靜清幽既感覺呢？由衣服、家具到文具都貫徹住樸素簡約嘅設計路線。近年亦涉獵到室內設計，呢種設計就俾人稱之為無印風。同北歐風有少許相似，都係走簡潔路線，無印風就比北歐風更簡潔，以「斷、捨、離」為靈魂所在，唔會有多餘修飾，實而不華，有時仲會加入榻榻米呢種日系元素添。身為MUJI Fans 嘅小編都好喜愛呢種乾淨俐落嘅設計風格。如果你都鍾意呢種咁舒壓嘅無印風，想帶入家中，咁就要睇下呢篇文啦。

無印風第一步：淺木色配上白色為主調

當淺木色遇上白色，就會好自然營造出溫暖又舒適既氛圍。屋企傢俬單品都要以淺色木材為主，無印大部分木製傢俱採用橡木，所以喺選擇木材上可以揀返橡木，又或者淺色系嘅白蠟木、梣木。牆身通常會用特白、百合白油漆，但近年無印風配色逐漸多元化，興起用大麥白、米色等暖白色，令無印風唔再單調統一，兼且能夠保留溫暖簡單既無印居家風貌。

無印風第二步：最強收納空間

無印風強調裝飾極少，俾人整齊舒服既感覺。但本身屋企多雜物，係咪就無辦法打造成無印風呢？

小編就估呢個問題應該好多人想問，畢竟由其女仔都會買好多護膚品同化妝品。要解決呢個問題，一個大既收納組合櫃幫到你。無印收納追求整齊同分類好，其中方格櫃係無印既一個特色，利用方格櫃可以分類好書本、擺設，至於零碎雜物可以入手置物籃。將雜物放入置物籃，收起晒望落去乾淨整齊咁就無問題啦。

無印風第三步：採光度要充足

行入MUJI你會覺得成間店光線好充足，所以喺無印風入面採光度好緊要㗎。

建議用雪白窗簾同百葉窗簾能夠透光入屋，另外盡量選擇玻璃間隔或者開放式設計整間屋企，令空間提升透徹感。當陽光透過窗口射入屋內嘅木質傢俱，自然會感受到陽光暖意，增添家既感覺。

無印風第四步：添置綠色植物同設計簡約家品

顏色啡白為主調感覺好單調，咁點算呢？由於無印風唔同北歐風，北歐風會搭上高彩度嘅家品，望落去會繽紛一啲。但呢種高彩度嘅家品喺無印風幾乎唔會出現。要協調呢種單調感覺，最好就係添置綠色植物。可以擺放MUJI常用嘅觀葉植物畫龍點睛，能夠令空間增添生活氣息。

通常家品設計要簡單，採用木、棉、麻呢啲天然無添加嘅材質，以無印風簡樸為原則，但如果要多啲層次感，可配搭攬枕、地毯等家品去豐富。

Facebook

WhatsApp

Threads